Virani

Ey yüzü gül bülbül-i gülzâr senden dönmezem Etmişem kâlû belâ ikrâr senden dönmezem Sad hezârân taş atar ol yâr için ağyâr bana La'net ol ağyâra kim ey yâr senden dönmezem Nâr-ı aşkın germini eyler melâmet gam değil Nûr olupdur ol bana gülnâr senden dönmezem Çün beni aşkın giriftâr eyledi bir bende kim Dü cihânı verseler hep var senden dönmezem Cismimin her zerresini sad hezârân etseler Kâilim ben olmağa sad bâr senden dönmezem Cümle âlem düşmen olsa ey melek-sîmâ cebîn Kimse hiç kılmaz bana ber-kâr senden dönmezem Aşkının Mansûruyem her dem ene'l-Hak söylerem Pes ne gamdır ger olam berdâr senden dönmezem Ölmezem şimden gerü Hak'tır mekânım tâ ebed Çün seni buldum şeh-i ebrâr senden dönmezem Cennet ü adn oldu vechin bu Vîrânî hasteye Her nefes söyler dili dîdâr senden dönmezem

Zâhid-i hodbîni gör Allah bilmez kandadır Cennetü'l-me'vâyı ister râh bimez kandadır Ermeyen savm u salâtın remzine ahvâline Bu perestiş üzre Beytullâh bilmez kandadır Dalmayan kendi vücûdu ilmine gavvâs-teg Bu ne hikmet nakş-ı ilmü'llâh bilmez kandadır Sûret-i âdemde Hakk'ı görmeyenler âşkâr Kaldı zulmet içre zâtullah bilmez kandadır Levh-i mahfuz tılsımın ol ki te'vîl eylemez Âdemin ayninde vechullah bilmez kandadır Men arefle cismini her kim ki bünyâd etmedi Âlem-i ma'nîde arşullah bilmez kandadır İçmeyen Hızr'ın elinden çeşme-i âb-ı hayât Ey Vîrânî işte Fazlullah bilmez kandadır

Bende-i Fazl-ı Hüdâ vü hem Mustafâ abdâller Cân u dilden uş muhibb-i Murtazâ abdâller Âh Hasen zehr-i şehîd ü vah Hüseyn'im deyüben Sîneler çâk eyleyüben Kerbelâ abdâller Âbidîn ü Bâkır u Ca'fer'den irşâd oldular Sıdk ile ihlâs ile nûr-ı bekâ abdâller Mûse-i Kâzım Alî Mûsâ Rızâ dergâhına Yüz sürüp nâz u niyâz ü hem duâ abdâller Askerî hem Mehdî-i sâhib-zamân'ın aşkına Cismine dağlar yakıp oldu fenâ abdâller Verdiler cümle cihânın varlığın yokluğa Bir deminde girdiler şâh u gedâ abdâller Âl u evlâd aşkına ser cümlesinden geçtiler Ana ata cân u mansıb elvedâ abdâller Uş niyâz eyler Vîrânî ayni cem âşıklara Tâ edeler yine gül-beng ü bukâ abdâller

Nefsin idrâk etmeyen Rahmân'ı bilmez kimdurur Nakş-ı zâtın bilmeyen insânı bilmez kimdurur Kul olup satılmayan elden ele Yûsuf gibi Hâkim-i Mısr olmayan Ken'ân'ı bilmez kimdurur Cism içinde cân u dil mir'âtını sâf etmeyen Görmedi ayne'l-yakîn cânânı bilmez kimdurur Sedd-i İskender olup zulmet yerağın görmeyen Âb-ı hayvân içre kim hayvânı bilmez kimdurur Derde her kim ki giriftâr olmadı Eyyûb gibi Zahmına em bulmadı Lokmân'ı bilmez kimdurur Nefs-i ejderhâsını katl etmeyen merdâne var Sanma ol merdânedir merdâne bilmez kimdurur Ey Vîrânî ehl-i diller sohbetinde devrimiz Anlamaz ol Fazl-ı Hak Yezdân'ı bilmez kimdurur